Manhá sábado 21 de maio terán lugar en Santiago de Compostela os I Encontros Escolares Galegos de Xogos Tradicionais, organizados por Brinquedia e o Departamento de Educación e Mocidade do Concello de Santiago.

Acollerán o Encontro o Campo de Bonaval e o CEIP Apóstolo Santiago, onde perto dun milleiro de cativos e cativas, compartillarán unha xornada arredor dos xogos que forman parte do noso Património Lúdico.

Estes Encontros constitúen un Acto de Apoio á Candidatura de Património Imaterial Galego Português

Unha vez constituida Brinquedia - Rede Galega do Xogo Tradicional, é o noso desexo dar-nos a coñecer, apresentando quen somos e os obxectivos que nos prantexamos cara o futuro.

Isto, xunto co primeiro acto que convocamos -os I Encontros Escolares de Xogos Tradicionais, que ademáis convertimos nun acto de apoio á Candidatura do Património Imaterial Galego-Português, é o que imos apresentar en ROLDA DE PRENSA xoves 12 de maio ás 12 da mañá no Salón Verde do Concello de Santiago de Compostela.

En pasadas datas e por segundo ano consecutivo, Santalla, unha pequena aldea do Concello d'A Pontenova, organizou o II TORNEO DE BOLOS FESTAS DE SANTALLA 2005 en colaboración co concello, que aportou trofeos e medallas para todos/as os/as participantes, un total de 40.

A comisión de festas e o Tenente-Alcalde d'A Pontenova, Jorge García, amosaron o seu interese por recuperar este xogo tradicional que até há dúas décadas era habitual en todo o município. Xunto ao grande número de participantes, destaca a presenza de meio cento de espectadores/as de todas as idades, suliñando a inscrición de participantes de entre 12 e 75 anos, e mesmo se deu o caso de participar avós, pais e netos dunha mesma família.

A Câmara Municipal de Paredes de Coura, en colaboración coa EPRAMI – Escola Profissional do Alto Minho Interior, promove, nos días 29 e 30 de Abril, a Mostra da Oralidade Galaico-Portuguesa. O obxectivo é apoiar a candidatura de Património Imaterial Galaico-Português apresentada na UNESCO.

A candidatura Multinacional de Património Imaterial Galaico-Português foi apresentada formalmente na UNESCO polos governos portugués e espanhol, como candidata á 3ª proclamación das obras-mestras do Património Imaterial, prevista para Novembro de 2005. É promovida pola Asociación Cultural “Ponte… nas Ondas”, co apoio de entidades e institucións de ambos os lados da fronteira.

programa

Hoxe 25 de abril (por certo, parabéns á outra beira do Minho, que andarán de celebración) o Concello de Mugardos inaugura unha Exposición sobre Xogos Populares que permanecerá aberta até vindeiro 5 de maio. Esta exposición está encuadrada dentro da 1ª Xornada de Xogos e Deportes Populares galegos, que se celebrará sábado 30 de abril ao longo de todo o día.

A organización da actividade corre a cárrego da Concellaría de Mocidade, Educación, Emprego e Política Lingüística deste Concello e conta coa colaboración do CEIP de Esteiro

web do concello

Hoxe 12 de abril deron comezo no Colexio de Cruceiro de Roo as V Xornadas Escolares de Xogos Populares e Tradicionais, actividade co-organizada polos colexios de Carnota, Louro, Esteiro (Muros) e Cruceiro de Roo.
Este encontro, estruturado en 3 xornadas, ten como obxectivos recuperar e reinsertar os xogos populares e tradicionais na actividade lúdica dos/as nenos/as, así como facilitar a convivéncia entre alunos/as através do xogo.
Cada colexio será sede dunha das xornadas e disporá de várias zonas de xogos polas que irán rotando os distintos grupos de nen@s previamente distribuidos, desenvolvendo distintas variedades de cada xogo.

O domingo día 24 de abril é o día sinalado pola organización da LNB para a disputa do II TORNEO DO PALÁN DE OURO na pista do Canteiro en San Pedro de Benquerencia (Barreiros) . Os paláns xa están en alto para o gran acontecimento desportivo no que palanadores e palanadoras de toda Galiza e de todo o mundo están sendo convocados para o grande torneu de San Pedro.
Contan-nos os amigos da A Asociación Cultural O Varal que non podemos esquecer que este foi o compionato que consagrou definitivamente a esa lenda da LNB chamada Ismael "O Zidane da billarda" como a máxima estrela do noso deporte, voltará Zidane a ser o palanador de ouro que foi naquel xa mítico I Torneo do Palán de Ouro celebrado na ardente pista de cemento de San Xurxo (Lourenzá)? A resposta está no ar de San Pedro de Benquerencia.

Pasado domingo 27, na Casa da Cultura de Riotorto, ficou constituida Brinquedia - Rede Galega do Xogo Tradicional. Cicais debido ao particular da xornada, a presenza física na Asemblea non foi mui numerosa, mália si foron muitas as entidades que manifestaron a súa intención de aderir-se a Brinquedia nas vindeiras datas.

Despois da Asembleia e antes da asistencia á Xornada de Birlos ao Canteiro que fechaba a Liga organizada pola Asociación ARCASCO, os/as asistentes achegamo-nos ao Pedregal de Irimia, lugar de nacimento do Pai Miño para fazer a "Foto de Família" do nacimento de Brinquedia, na que falta o Paco Veiga, que era o retratista.

Os/as amigos/as da Asociación Cultural O Varal, en Barreiros (Lugo) ofrecen unha alternativa ben curiosa e interesante para esta semana santa: a Escola de Billarda. Unha proposta en tres xornadas para o desfrute -nomeadamente- dos/as nenos e nenas deste concello, mais tambén para todas aquelas persoas interesadas.

Atópanse, ademáis, refrendados/as pola APNED (Asociación de Pais e Nais de nenos con Discapacidade), quen confía nesta Escola de Billarda como método válido para a inclusión social dos seus cativos.

Vindeiro domingo 27 de marzo, ás 12 da mañá, na Casa da Cultura do concello de Riotorto (Lugo) terá lugar a Asembleia Fundacional de Brinquedia-Rede Galega do Xogo Tradicional.

Á mesma están convocadas todas aquelas persoas e entidades con interese na defensa e promoción dos xogos tradicionais galegos, tiveran ou non asistido á xuntanza celebrada en Melide o pasado 26 de xuño.