E xa que estamos de tour, cómpre traer aquí tamén a nova de que o novo director xeral de Deportes do Governo de Canarias, Ramón Miranda, asumía -na súa presentación no cargo- unha aposta firme e decidida polos xogos e deportes tradicionais canarios.
A conselleira de Cultura, Deportes, Políticas Sociais e Vivenda, Inés Rojas, trasladoulle ao que fora alcalde de Garachico a necesidade de "aunar esforzos, agora máis ca nunca, para que o deporte canario siga onde se merece”.
E aínda que por estes lares sigamos agardando algún responsábel político que vexa a potencialidade do seu propio Patrimonio (do cultural, que do outro xa a ven de sobra) e aposte decididamente polo patrimonio lúdico galego, non está de máis ir coñecendo e parabenizando estas inciativas doutros lugares.
Máis info

O concello valencià de Vila-real, através da Concellaría de Normalización Lingüística e Tradicións (cuxo nome xa semella unha declaración de intencións), pretende recuperar os xogos tradicionais para que "pervivan no futuro" e, nomeadamente para lles transmitir aos máis mozos "a historia e os sinais de identidade da súa cultura".
No pasado mes de decembro anunciaban as súas intencións neste ámbito e -despois de convocar no pasado mes de decembro un curso de Monitor de xogos tradicionais- puidemos saber por declaracións do primeiro tenente de alcalde Pasqual Batalla en pasadas datas, que o Plano Municipal de Recuperación de Solares inclúe a creación de espazos para os xogos tradicionais, que deseñará a Federació Valenciana de Jocs Tradicionals
A cesión dos solares formalizarase através dun contrato, o que lles permitirá aos propietarios evitar o gasto de mantemento dos mesmos, á vez que alixeirará as cargas económicas que se derivan do pagamento dos respeitivos impostos.
Máis info aquí
Ou aquí
Ben podía tomar alguén exemplo por aquí ao Norte.

A Asociación cultural e pedagóxica Ponte... nas ondas! ven de convocar unha nova xornada de comunicación interescolar, a celebrar vindeiro 1 de xuño a través do seu web.
Participarán nesta edición centros educativos de Galiza e Portugal, ademáis doutros países tais como Cuba, Chile, Colombia ou Brasil.
A emisión a través de Internet correrá por conta de UVIGO-TV da Universidade de Vigo. A programación comezará ás 10.00hs. da mañá (hora galega) e poderá ser visionada posteriormente en formato de vídeo e audio á carta.

Antes, o 25 de maio, convocan a X Mostra da oralidade galego-portuguesa, que se desenvolverá baixo o lema Contamos no mundo no Museo Verbum, de Vigo, e na que participarán narradores orais de Galiza, Portugal e Brasil.

Vindeiro sábado 11 de febreiro, terá lugar na localidade de Ponteceso o I Campionato de Tirabalas de Ponteceso, organizado polo Museo Etnolúdico Galego (MELGA) e o Concello de Ponteceso.

A cita será apartir das 11 h. no Centro Cultural e a inscrición está aberta até o día 9 de febreiro. A competición será por idades e por eliminación directa aos 15 lanzamentos, con premios populares para todas as categorías.

Cada participante terá que levar o seu propio tirabalas, agás na categoría dos máis cativos (até 5 anos), que recibirán os tirabalas directamente da organización.

O Movimento de renovación pedagóxica Nova Escola Galega ven de apresentar os 2 últimos números da Revista Galega de Educación. O nº 51, consiste nun monográfico coordenado por Xosé Manuel García e Xosé López e dedicado aos xoguetes tradicionais, que xira arredor do valor educativo e pedagóxico destes xoguetes e conta con numerosas colaboracións do panorama estatal.

Por outra parte, presentouse tamén o número 50, un número especial que conmemora o 25º aniversario desta revista. É preciso desexarlles unha andaina -cando menos- tan produtiva e interesante para os vindeiros 25 anos.

Máis info

No inicio do mes de novembro celebrábase en Parada do Sil (Ourense) un acto de exaltación do xogo de Bolos desa localidade. Arredor da festa do Magosto, xenerouse un espazo lúdico –con xogos tradicionais- e outro divulgativo, onde se xuntou aos veciños para darlles a coñecer a situación do xogo tradicional por excelencia deste concello, ao tempo que se presentaban algúns dos resultados de pescuda sobre o xogo que, nos últimos anos, leva coordenado o educador e veciño de Caxide Juanjo G. Rodicio.

Este acto serviu tamén como antesala da presentación do convenio de colaboración asinado entre o concello de Parada do Sil e a Fundación Laya – Promoción do patrimonio lúdico para a investigación, promoción e posta en valor do xogo de bolos tradicional no concello da Ribeira Sacra.

Un ano máis, Brinquedia promove entre en todo o país a celebración do Día do Peón en centros educativos, concellos e entidades asociativas. A data elexida volta a ser o 11 de novembro facendo bon o noso refrán Polo San Martiño, peóns ó camiño.
O acto central desta edición será no concello de Fene, polo que a elaboración do manifesto correu por conta do escritor fenés Ramón Loureiro, que podedes descargar máis abaixo, xunto a outros materiais de interese.
A novidade desta edición é a celebración do día en distintos lugares da península, tais como Euskadi, onde a Ikastola Alkartu (Barakaldo - Bizkaia), organiza unha exposición virtual de peóns decorados; Catalunya, coa particpiación dos Amics de la Baldufa (Barcelona), e Andalucía, coa colaboración do Museo del Trompo de Sebastián del Pino Cabello (Antequera, Málaga).

Máis información no web de Brinquedia - Rede galega do xogo tradicional

A Asociación Cultural e Pedagóxica Ponte…nas ondas! celebrou o pasado 19 de outubro a 4ª Xornada Escolar de Xogos Tradicionais Galego-Portugueses no colexio Infante Felipe de Salvaterra de Miño onde participaron 300 alumnas/os de Galiza e do Norte de Portugal.
Seguindo a dinámica desta asociación, de dar a coñecer o patrimonio tradicional común a galegos e portugueses, así como duscubrírllelo ao alumnado das dúas beiras do Miño no ámbito escolar, a Asociación Ponte... nas ondas! organizou unha reunión lúdica e non competitiva no marco dun día de convivencia entre rapaces e rapazas de escolas galegas e portuguesas.
Por outra parte, onte 27 de outubro tamén colaborou asociación nunha nova edición do Unidos por un clic, encontro de comunicación escolar organizado polo colexio colombiano Gimnasio del Norte de Bogotá. Nel participaron o CEIP Infante Felipe de Salvaterrra de Miño e o IES Terra de Turonio de Gondomar.

Na fin do pasado mes de setembro (23, 24 e 25 de setembro), tivo lugar na cidade italiana de Verona unha nova edición do Toca-tì - Festival de xogos de rúa. Este festival, que cada ano ocupa as rúas do centro histórico da cidade do Véneto achegando á súa poboación e aos visitantes dúcias de xogos tradicionais de distintos lugares de Italia e de Europa, voltou a sorprender e a sumar cifras de visitantes que no eido da cultura tradicional seguen semellando ciencia-ficción. A música tradicional tamén ocupa un espazo importante, o que -unido aos múltiples actos e eventos paralelos- fan deste festival un dos máis importantes -senón o máis- dos que se celebran arredor do patrimonio lúdico no mundo.

Segue aberto o prazo de matrícula para o III Curso sobre o patrmonio lúdico que vai ter lugar en Melide os vindeiros 21 e 22 de outubro, nas instalacións do I.E.S. de Melide.
Este curso vai destinado ao profesorado do ensino de Primaria e Secundaria en xeral, e conta con un cupo de 90 participantes e unha duración de 12 horas (atopándose en trámite a homologación da Consellaría de Educación).

O curso está organizado por Nova Escola Galega e a AGXPT e podedes consultar aquí para MAIS INFO